مــيـثـاق الـــهـوى !

بقلم- د.سعاد درير
كاتبة مغربية
لسانْ الوَرْدْ
يحْكِي في مراية الشُّوكْ
حكاية الودّ
والقَلْبْ فِيهْ مشبُوكْ..
يرسُمْ للحايرْ عيُونْ البَهْجَة
ويحلُمْ باشْواقهْ تسُرّ الْمُهْجَة..
{{{
اللِّي عَنْدُو الزِّينْ
عْلاَشْ يبْكِي؟!
محْجُوبْ منْ عِينْ
البَايتْ يشْكِي..
{{{
أَحْوَالْ الوَرْدْ
جَنَّة ونَارْ..
وشُوك الوَرْدْ
يدْفنْ أَسْرَارْ..
{{{
مُحَالْ الشُّوقْ مُحَالْ يجِيبُو قبَالة البَابْ..
ربِّيتْ الوَلْفْ علِيه، وكَاسْ الهوَى ما طابْ..
{{{
حمَامِي غابْ،
غابْ بلاَ رَجْعَة
منْ فُوقْ جبالْ الوَلْفْ الْمَاضِي بِيَا نشْوَانْ..
كلامِي عَابْ،
عابْ الزّمانْ علِيهْ
وقَلْبِي هاجْ، قُدَّامهْ مُوجَة ترْوِي العَطْشَانْ..
{{{
الصبرْ مندِيلْ علِيه نعَوَّلْ
يلَمْلَمْ اللِّيلْ، والشُّوقْ مَا يطَوّلْ..
{{{
اَشْمَنْ بدايَة
فيها نتْرَجَّى مَوَّالْ حبِيبي؟!
اَشْمَنْ نهايَة
بِيها نتْحَدَّى مَرْسُولْ حبِيبي؟!
{{{
كِيفاشْ ندَأوِي طفَّاية الْحُبّ؟!
وبأَيّ وصِيّة نصَبَّر الْقَلْبْ؟!
{{{
يا اللِّي هدِيتْنِي وَرْدَة فوَّاحَة،
مِيثاقْ الهوَى أوْرَاقهْ ذبَّاحَة..
اُطْلُبْ ألفَنّ في عيُونْ الزِّينْ،
وفُمّ الرُّوحْ يَسْبقْ الْعِينْ.
ــــــــــــــــــــــــــــــ
مُقابِل المفردات المغربية:
ــــــــــــــــــــــــــــــ
-مراية: مرآة.
-مشبوكْ: مقترن ومرتبط به.
-اللِّي: الذي.
-عْلاشْ: لماذا؟
-البايتْ: الذي يَبِيتُ.
-الوَلْف: الأُلْفَة والموَدَّة والمحبَّة.
-نعول: أُعَوِّلُ/ أحسب حسابَه.
-اَشْمَنْ:أَيّ؟
-كِيفَاشْ: كَيْفَ؟
-طفَّاية: أداة لإطفاء السجائر.
-فُمّ: فَم.