شـــاور لي يــا مــركــب المـــــوج

بقلم: د. سعاد درير كاتبة مغربية
واشْ تعرَفْ على الوردْ
يا الگاعدْ على الشوكْ..؟
بِينْ الدَّمعة والخَدّ
ما يْبَكِّي اللِّي صَادُوكْ..
{{{
يا الصيّاد في بَحرْ الغَفْلَة
واشْ دَلَّكْ على دِينْ اللِّيلْ؟
شفْتكْ بايعْ الغالي بالرّخيصْ
وحالفْ تطْفِي ضَوّ القنديلْ..
{{{
خُنْتْ بلادكْ وطحَنْتْ اولادْها
شريتْ جيوبْكْ وبعْتْ رجالْهَا
عمِيتْ على عيوبْكْ وعرِّيتْ أبْطالْها
فضَحْتْ اجْوادْها وقَلَّلْتْ منْ شَانْها..
{{{
الْوَرْدْ، الْوَرْدْ يا امَّا،
بكَّاني شُوكْه..
فادِيهْ أنا بدموعي،
وإلى ذبَلْ ما نشُوفْه..
{{{
حفَرْتْ أنا في ضلُوعي
وبنِيتْ عرُوشْه،
دفَنْتْ ثمَّة الظلامْ
وصاحبْتْ وحُوشْه..
{{{
مَاشِي عِينِي اللِّي بكَتْ،
قلبي هو اللِّي باكي..
مَاشِي عِيني اللِّي حكَتْ،
وجعي هُوَ اللِّي حاكي..
{{{
دَقِّيتْ حجَرْ السّدْرَة،
وطلِيتْ شفاهْ الگَمْرَة..
الليلْ غمزَتْ لي عِينْه،
حلَفْتْ حتى نكْفرْ بدِينْه..
{{{
انْزلْ، انْزلْ لعنْدِي،
انْزلْ يا فُمّ الگَمْرَة..
جرَّبْتْ نطْلَعْ لعنْدكْ،
طحْتْ طِيحةْ اللِّي ما يبْرَا..
{{{
داوِيني، داوِي
يا نجومْ سمايا،
شاهدَة على اسْراري،
وعِينيكْ مرَأيَة..
{{{
عْلاَشْ، عْلاَشْ يا لِيلْ التّرابْ
طامعْ انْتَ تطْوِينا
تحْتْ جناحكْ وترَشِّينا؟!
{{{
مْنَاشْ، مْنَاشْ يا بَحرْ العذابْ
ناوي انْتَ تهْرَبْ بِينا
ابْعَدْ منْ بابْكْ وتمَشِّينا؟!
{{{
شاورْ لي، شاورْ
يا مَركبْ الْمُوجْ، وارْمِيني
عندكْ، خُذْنِي يَاللهْ،
خايفْ هوَى الليلْ يدِّينِي..
{{{
صَفِّيتْ لساني
مَا شربْتْ المعاني..
سرَّجْتْ خيلْ ميزاني،
وبلاَ «بارودْ» الليلْ اعْمَاني..
{{{
مُقابِل المُفْرَدات المغربية:
- واشْ: ماذا؟ هَلْ؟
- الگاعدْ: الجالِس.
- اللِّي: الذين.
- صادوكْ: أتمُّوا مهمةَ صَيْدِكَ.
- دَلَّكْ: دَلَّ، يَدُلُّ.
- تطْفِي: تُطْفِئ.
- ضَوّ: ضَوء.
- عمِيتْ: تعمَّدْتَ ألاَّ تُبْصِرَ.
- شَانْها: شأنها.
- يا امَّا: يا أُمِّي.
- إِلى: إذا.
- اجوادْها: أصحاب الجُود والأخلاق الكريمة.
- مَاشِي: لَيْسَ.
- اللِّي: التي.
- السّدْرَة: شَجَر السِّدْر.
- طلِيتْ: الطّلاء هو الصّباغة.
- الگَمْرَة: القَمَر.
- انزلْ لعندي: اِنْزِلْ إِلَيَّ.
- فُمّ: فَم.
- نطْلَع: أَصعَد.
- طحْتْ: سَقَطْتُ.
- طِيحة: سُقوط.
- ما يبْرَا: لا يُشْفَى.
- سمايا: سمائي.
- مراية: مِرآة.
- عْلاَشْ: لماذا؟
- ترَشِّينا: تُبْلِينا.
- مْنَاش: مِمَّ؟
- يَاللهْ: هَيَّا بِسُرعة.
- يدِّيني: يَحملني ويَأخذني بعيدا.
- بلاَ: بِدُون.
- بَارودْ: ما يَخرج مِن فُوهَتَيْ البندقية.
- اعماني: أعماني.