+ A
A -
حُطّ علَى قَلبَكْ حجْرَة

يكْفِي ما سمَعْتْ منْ الهَدْرَة

رَبِّي حامِيكْ، حافْظَكْ وصَاينَكْ

مَهْما العَبْدْ يبْنِي منْ حَفْرَة..

{{

الرِّيحْ اللِّي تجِي تدِّيكْ

شْحالْ خسَرْتْ قَبْلي منْ شرِيكْ

رسَتْ سفِينتكْ في بَحْر اللِّيلْ

وأَنا مُوجي عَدَّى بلاَ بِيكْ..

{{

داوِيتْ حتَّى عيِيتْ، ومَا عيَا الصبرْ

العِين تحْكِي، والْمَنْدِيلْ يهْدَرْ

شَقِّيتْ سمَايا بشُوكْ لسَانِي

الرُّوحْ تُوشكْ تطْلَعْ قَدّ ما الزّمانْ يعْصَرْ..

{{

طرِيقْ الظّلامْ ما منْه هرُوبْ

واللِّيل، عوَّامْ أنا فِيهْ مَغْلُوبْ

رسَمْتْ في طَرْفْ العِينْ ضَحْكَة

ما صَدَّقْنِي احدّ وأنا مرْشُوقْ بالطُّوبْ..

{{

عافَاكْ، عافَاكْ يا بابْ غدَّا

ما بقَى لي جهْدْ نقْدَرْ بِيهْ نبْدَا

خِيلْ الصَّبرْ صَدّ بلاَ بِيَا وزَادْ

وذبلَتْ في يدِي شْحَالْ منْ وَرْدَة..

{{

بحَّارْ أنا بلاَ مجْدَافْ ضَيَّعْ حالَهْ

راغبْ أنا في مشْمُومْ الوَرْدْ نقْطَفْ بحَالَهْ

تمحَّنْتْ سنِينْ وامْتَحَنْتْ الزِّينْ، والزِّينْ سرَّهْ

سرَّهْ عنْد العارفِينْ بالفَنّ، وهادُوكْ رجَالَهْ..

{{

يا طالبِينْ مرْشُوشْ الكلاَمْ يحَلِّي الهوَى

العِينْ في العِينْ، واللسانْ دخَلْ سُوق راسَهْ وتلْوَى

اللِّي فاتكْ بلِيلَة فاتكْ بحِيلَة، ومَا للأيَّامْ

تعْرَفْ تزْرَعْ سُمّهَا في الضّلُوعْ وتبْخَلْ بالدّوَا!..

مُقابِل المفردات المغربية:

- عافاكْ يا بابْ غدَّا: رَجاءً يا بابَ الغَدِ.

- حُطّ: ضَعْ.

- الهَدْرَة: الكلام.

- تجِي: تأتي.

- تدِّيكْ: تَأخذكَ.

- شحالْ: كَمْ؟

- رسَتْ: رَسا – يَرْسُو.

- عدَّى: مَضَى ومَرَّ وعَبَرَ.

- عيِيتْ: تَعِبْتُ.

- عيَا: تَعِبَ.

- يهْدَرْ: يتكلَّم ويَبوحُ.

- قَدّ: بِقَدْر.

- احدّ: أحَد.

- نبْدَا: أَبْدَأُ.

- صَدّ: اِنطَلَقَ وذهبَ وغابَ.

- بحالَه: مِثله.

- تمحَّنْت: تعذَّبتُ.

- هادوكْ: أولئك.

- يحَلِّي: يحَلِّي الهوى: يُصَيِّرُ الهَوَى حُلواً بَلْ أَحْلَى مِن قَبل.

- تلْوَى: اِلْتَوَى.

- اللِّي: الذي (مَنْ).




بقلم :د. سعاد درير
كاتبة مغربية
copy short url   نسخ
09/03/2020
2145