+ A
A -
صباح عينيكْ
صباح قلبكْ
صباح الحُبّ
صباح الشُّوقْ..
{{{
صباح العُودْ
صباح النَّأيْ
صباح اللّسان البنَّأيْ
صباح الوَرد بلا شُوكْ..
{{{
جُودي، جُودي يا عِينْ
اشهدِي على اللِّي هواهْ
ما عرفته غادي بيا لفِينْ
جُودي، جُودي يا شفاهْ..
{{{
غادي بيَا الليلْ غادي نشوانْ
غنَّى على الشمعة تجاري الحيرانْ
وبينْ الحاجبْ وبينْ العينْ
تبوحْ مرايَة ويجُودْ لسانْ..
{{{
جُودي، جودي يا نخلة بتَمر الملحونْ
جُودْ يا عنقود الروحْ، سخَّنْ العود، تدْفا الاوتارْ
جُودْ يا مرسول الهوى اللِّي حارْ
بينْ العتبة وبينْ باب الدارْ..
{{{
عين الليلْ تبَكِّي طيورْ
عين الليلْ تهيّجْ الساقية
عين الليلْ تحكي للذيابْ في نصّ الليلْ
حديثْ وسادَة يغْزَل المرَارة
في حلق الزِّينْ
عين الليلْ دمعة دمعة تعبّدْ طريق الايّامْ
وفِينْ
ذاك المنديلْ
يحلب بغزارَة
من عنب الدالية
في جنان الروحْ..
{{{
بحر الْمُحال فيه غادي عوَّامْ
عاديت أسياده بحر الْمُحالْ
رتَّبْت أمواجه
صاحَبْت أجواده
راضِيتْ أنا رماله..
{{{
دقِّيتْ أنا على أبواب الحِيتانْ
طلَبْتْ شرِيبة لقلبي العطشانْ
هزِّيتْ الكاسْ
فرَّغْتْ شوية شوية الإحساسْ
نادِيتْ بصُوت أَهْل الميزانْ
فصَّلْتْ أنغامي مقَاسْ مقاسْ
على ناس الحالْ..
{{{
جَادُوا ناس الحالْ
وجادت العينْ..
{{{
تَجْرِي عين الليلْ
وتذُوب الشمعة
وترْجُف الدمعة..
{{{
العينْ في العينْ
والشّفاهْ تنادي
وزِيدْ من عندك
يا ذاك الغادي
تدركْ مُرادي
وأنا غادي
مازالني غادي
ما عرَفْتْ لفِينْ!
مُقابِل المُفْرَدات المغربية:
- العُودْ: آلة العود الطربية.
- بنَّأيْ: بَنَّاء.
- اللِّي: الذي.
- غادِي: ماضٍ.
- سخَّنْ: اِعمَلْ على تسخين.
- مرايَة: مِرآة.
- تدْفا: من الدِّفء.
- حارْ: من الحيرة.
- نصّ الليل: منتصَف الليل.
- الذيابْ: الذئاب.
- شرِيبة: شربة ماء.
- هزِّيتْ: رفَعْتُ.
- فرَّغتْ: صَبَبْتُ.
- شوية شوية: شيئا شيئا.
- زِيدْ من عندك: أضِفْ من تلقاء نفسك.
- مازالنِي: مازِلْتُ.
copy short url   نسخ
20/01/2020
2419