+ A
A -
بقلم: د. سعاد درير
كاتبة مغربية
زِينْ بلادي نسيم هواها وماها وصحراها..
زين بلادي جُودْ اولادها وظلّها ونقاها..
زين بلادي تُراثها وحضارتها ودفاها..
زين بلادي صنعة ايدين رجالها ونساها..
زين بلادي شمس الحُبّ ونِية أهلها ووفاها..
زين بلادي بساط موَدَّة من فُمّ لفُمّ ما احلاها..
{{{
مغربية واو واو واو..
مغربية واااااااه مغربية..
{{{
بنت المغرب جمعَتْ سرّ الحكمة والزِّينْ..
بنت المغرب لالاَّهُمْ في الهمَّة والعوِينْ..
بنت المغرب ترضيني وتسرّ القلب والعينين..
بنت المغرب مرسول هوى ودْوَا الوالدين..
{{{
بِينْ شفاه الوردة والطِّيرْ
قصَّة غرام تبشَّر بالخِيرْ..
بين القلب الحالم بالأمان
وباب الجنة على الأرض كاينْ إيمان..
{{{
إيماني بيك يا مغربية
حصيرة حياة تسبقْها النية..
إيماني بيك يا مغربية
قصيدة حصاد حارثاه علانية..
{{{
مغربية وراسْمالها كتاب المعاني..
مغربية وإحساسها ماشي أناني..
مغربية وتاج راسها النُّور الرّبَّاني..
{{{
شاعرة ومُلْهِمَة بعِينْ فنانة تشكيلية..
ناقدة وأديبة وربَّة بيت مُرَبِّية..
دكتورة ولَبيبة وبنت الدار الْمَرْضِية..
{{{
حَدّك ثمَّة يا لسان الشوق اللي جابُو عند بابي
طيرْ جنان الرّمان وكان ما كُنت انتَ أعز احبابي
كانْ الولف اللي ربَّاني على الشوك هجَرْ محرابي..
{{{
أنا شُفْت العِينْ ومن ماها روِيتْ..
واللي قلبُو طابْ يدهْنُو بالزِّيت..
واللي صادُو خاتمْ الهوى ما يقول نوِيتْ
{{{
هزِّي راسك انتِ يا مولاة العقلْ،
ربِّي اللي اعطاك، والسّرّ عليك نزَلْ،
زِيدي للقُدَّامْ، ولا تخَلِّي الدمعة توقفْ
بِينْ اقدامكْ ولا تخَلِّي عِينْ الحكمة تغفَلْ..
{{{
كُوني وردة محمِية بالشُّوكْ..
كُوني گْمْرَة حُرَّاسْها ليلْ ونجُومْ..
كُوني جمْرَة ما تطْفِيها امْطارْ..
كُوني مركَبْ ما تكْفُر بِيه امْواجْ..
{{{
مُقابِل المُفْرَدات المغربية:
- گمْرَة: قَمَر.
- هواها: هواء.
- ماها: ماء.
- نقاها: نقاء.
- دفاها: دفء.
- نساها: نِساء.
- وفاها: وفاء.
- فُمّ: فَم.
- العوِينْ: المساعَدة، العَون.
- كاينْ: يوجَد.
- راسمالها: رأس المال.
- ماشِي: ليسَ.
- حدّك ثمَّة: توقَّفْ.
- الولْف: التعوُّد، المحبة.
- مولاة: صاحبة.
copy short url   نسخ
30/12/2019
2563